Siopwyr Caerdydd Yn Dathlu Dydd Gwyl Dewi Mewn Marchnad Bwyd Iawn Newydd

Bydd gan bobl Caerdydd fwy byth o gyfle i brynu bwyd a diod a gynhyrchir yn lleol pan fydd Marchnad Bwyd Go Iawn y Rhath yn agor ar Ddydd Gwyl Dewi [Sadwrn 1 Mawrth].
 
Bydd y Farchnad, a gaiff ei sefydlu a’i rhedeg yn y brifddinas gan Farchnad Glanyrafon, yn rhoi cyfle i fwy o bobl i brynu nwyddau bob wythnos yn uniongyrchol gan gynhyrchwyr o Gymru.
 
“Cafodd Marchnad Bwyd Go Iawn y Rhath ei sefydlu mewn ymateb i alw gan siopwyr Caerdydd am fwy o fwydydd lleol a chynnydd yn nifer y cynhyrchwyr sy’n datblygu i ateb yr angen hwnnw,” meddai Steve Garrett, cadeirydd Cymdeithas Marchnad Gymunedol Glanyrafon.
 
“Fel gyda marchnad Glanyrafon, a enillodd wobr y Gwir Flas, bydd pawb sydd â stondin yn y Rhath wedi magu, tyfu neu wneud y cynnyrch a werthant, felly gall cwsmeriaid fod yn hyderus y bydd y bwydydd a werthir yn ffres ac iach a gyda’r blas gorau posibl.”
 
Croesawyd lansiad yr ail farchnad Bwyd Go Iawn yng Nghaerdydd gan Rhodri Morgan, Prif Weinidog Cymru, sy’n ymweld yn rheolaidd â marchnad fwyd Glanyrafon.
 
Dywedodd, “Mae’n gynllun gwych ac rwy’n siwr y daw Marchnad Bwyd Go Iawn y Rhath ar ddydd Sadwrn yr un mor boblogaidd ag yw Marchnad Glanyrafon ar ddydd Sul. Pan na fydd modd i mi fynd i Lanyrafon ar fore Sul, byddaf yn gwneud yn siwr fy mod yn mynd draw i Glwb Chwaraeon Mackintosh ar ddydd Sadwrn.
 
“Mae prynu’n lleol a phrynu cynnyrch o Gymru’n golygu mwynhau bwyd ffres o safon uchel a hefyd helpu cynhyrchwyr ac economi wledig Cymru.”
 
Dywedodd Steve Garrett, “Bydd Marchnad y Rhath yn anelu am yr un cyfuniad o ddewis eang o fwydydd ffres o Gymru, yn cynnwys bwyd organig, a‘r awyrgylch gyfeillgar a wnaeth Farchnad Glanyrafon mor llwyddiannus am y naw mlynedd ddiwethaf.
 
“Bydd digon o adloniant hefyd, a gan y bydd yn Ddydd Gwyl Dewi, bydd tyfwyr blodau lleol yn rhoi cennin Pedr ffres i siopwyr eu gwisgo i nodi’r achlysur ac i gael pawb i ymuno yn ysbryd Dydd Gwyl Dewi, bydd hefyd gyfle i ennill hamper o gynnyrch gan stondinwyr mewn raffl rad ac am ddim.”
 
Cadarnhawyd y bydd mwy na 25 stondin yn bresennol pan lansir marchnad y Rhath ar 1 Mawrth, yn cynnwys stondinau ‘bwydydd byd’ yn adlewyrchu amrywiaeth ethnig Caerdydd, a bydd hefyd yn anelu i osgoi defnyddio unrhyw fagiau plastig.
 
Agorir y farchnad am 9.30am gan Rodney Berman, Arweinydd Cyngor Dinas Caerdydd sy’n gynghorydd yn yr ardal, a disgwylir i’r Prif Weinidog ymweld tua 1pm.
 
Cynhelir y farchnad yn y maes parcio o flaen Clwb Chwaraeon Mackintosh ar gornel Stryd Keppoch a Plasnewydd Place yn y Rhath rhwng 9.30am a 1pm bob dydd Sadwrn.

I gael mwy o fanylion am y digwyddiad agoriadol a’r cynhyrchwyr sy’n cymryd rhan, cysylltwch â:
 
Steve Garrett
Cymdeithas Marchnad Gymunedol Glanyrafon
Ffôn: 029 20227982
E-bost: mail@riversidemarket.org.uk
Gwefan: www.riversidemarket.org.uk

Cyhoeddwyd yr erthygl ar: 22 February 2008